Maksim Raŭski: Дынаміка курса валютаў у студзені 2018-га

У студзені 2018-га асноўны вэктар курсавога руху валютаў краін Ўсходняй Эўропы і СНД быў на ўмацаваньне да галоўнай сьветавой валюты – даляра ЗША.

Такі рух быў абумоўлен, у першую чаргу, аслабленьнем самога даляра ў гэтым месяцы (індэкс USDX зьнізіўся за студзень на 3,44%). Адпаведна, умацаваўся эўра (індэкс EURX вырас на 1,63%), а зь ім узьняліся да даляра і ўсе нацыянальныя эўрапейскія валюты, якія арыентуюцца на адзіную эўравалюту.

Акрамя таго, у студзені вырасла вартасьць нафты (кошт гатунка Brent падаражэў на 3,26%), што дадала моцу расейскаму рублю, які ўплывае на курсы валют краін СНД. Тым ня меньш, нягледзячы на тое, што ў студзені 2018-га на ₽-рубель быў двайны павышальны ўплыў (падзеньне даляра і ўздым нафты), расейская валюта не вайшла ў сьпіс лідэраў курсавога роста. А тры валюты СНД нават аслабелі да даляра: сум Узбекістана, рубель Беларусі ды самані Таджыкістана.

Больш умацаваліся да даляра як раз валюты краін Усходняй Эўропы: верхняя палова студзеньскага рэйтынга – амаль выключна валюты Эўразьвязу. Тройка лідэраў – куна Харватыі, крона Чэхіі, злоты Польшчы.

Найбольш амплітудная курсавая дынаміка ў студзені была ў ўкраінскай грыўні: да сярэдзіны месяца грыўня стала самай саслабеўшай валютай, але ў апошні тыдзень яна рэзка аднавіла сваю вартасьць, перавысіў нават узровень пачатку месяца. У адрозненьне ад беларускага рубля.

Ніжэй – дынаміка курсу асобных валютаў да даляра ЗША.

Эўра

У эўразоне знаходзяцца наступныя краіны Ўсходняй Эўропы: Славенія (з 2007-га года), Славаччына (з 2009-га), Эстонія (з 2011-га), Латвія (з 2014-га), Летува (з 2015-га). Чарнагорыя таксама карыстаецца эўра (з 2002-га года), але без адпаведнага пагадненьня з ЭЦБ. Акрамя таго, да эўра жорстка прывязаныя валюты Балгарыі і Босніі і Герцагавіны. На эўра шчыльна арыентуюцца таксама валюты Македоніі, Сербіі і Харватыі.

Рубель Беларусі.

Падзеньня беларускага рубля ў першай дэкадзе студзеня было настолькі значным і імклівым, што наступны за ім уздым ледзь здолеў яго кампенсаваць.

Грыўня Ўкраіны.

Большую частку студзеня грыўня толькі падала да даляра ЗША, але імклівы аднаўленчы ўздым украінскай валюты ў апошні тыдзень дазволіў нават перавысіць даляравую вартасьць грыўні на пачатак месяца.